AVE, Maris stella,

Dei Mater alma;

Atque semper Virgo,

Faelix coeli porta.

Sumens illud Ave

Gabrielis ore,

Funda nos in pace,

Mutans Evae nomen.

Solve vincla reis,

Profer lumen caecis,

Mala nostra pelle,

Bona cuncta posce.

Monstra te esse matrem;

Sumat per te preces,

Qui, pro nobis natus,

Tulit esse tuus.

Virgo singularis,

Inter omnes mitis,

Nos culpis solutos,

Mites fac, et castos.

Vitam praesta puram,

Iter para tutum;

Ut videntes Jesum,

Semper collaetemur.

Sit laus Deo Patri;

Summo Christo decus;

Spiritui Sancto,

Tribus honor unus.